Cynnig deiseb

Mae dwy ffordd o gyflwyno deiseb – ar bapur a drwy ddefnyddio’r system e-ddeisebu. Mae’r system e-ddeisebu yn fwy effeithlon ac mae’n bosibl y gall eich helpu i gyrraedd mwy o bobl; fodd bynnag, mae croeso i chi ddefnyddio’r dull sydd fwyaf addas i chi. Gallwch ddefnyddio cyfuniad o'r ddwy system, ond dim ond un fersiwn y gall pobl ei llofnodi.

Cyflwyno deiseb drwy’r system e-ddeisebu

Os ydych am gynnig e-ddeiseb, dylech ddefnyddio’r  ffurflen ar-lein i gyflwyno’ch deiseb, a chaiff ei rhoi’n awtomatig ar ein gwefan wedi iddi gael ei chymeradwyo. Byddwn yn rhoi gwybod i chi pan fydd hyn yn digwydd. Rhaid i ni gael manylion cysylltu’r prif ddeisebwyr i ni fedru gwneud hyn.

Cyflwyno deiseb ar bapur

Cyn cychwyn casglu llofnodion, cysylltwch â'r tîm deisebau i drafod geiriad y ddeiseb. Mae ffurflen ar-lein ar gyfer cynnig deiseb ar gael i’w lawrlwytho ar ffurf dogfen Word neu ar ffurf dogfen pdf ac mae’n cynnwys canllawiau i’ch helpu i’w llenwi.

Gofynnwn i chi ei llenwi a’i hanfon atom cyn i chi ddechrau casglu llofnodion os ydych chi’n bwriadu gwneud hynny ar bapur neu gallwch ein ffonio neu anfon neges e-bost atom drwy ddefnyddio'r manylion cyswllt isod. Mae hyn yn ein galluogi ni i roi cyngor i chi ynglŷn â sicrhau y gallwn dderbyn eich deiseb arfaethedig. Mae hi’n anodd iawn newid geiriad deiseb ar ôl casglu’r llofnodion.

Cyn defnyddio’r templed, dylech ddarllen yr amodau a’r telerau perthnasol.

Dyma’r broses ddeisebu:

Anfon y ddeiseb arfaethedig atom

Cadarnhau bod y ddeiseb yn cadw at yr amodau a thelerau priodol

Bydd yn methu:

• Os yw’r ddeiseb yn sub judice  

• Os nad oes gan y Cynulliad Cenedlaethol y pwerau perthnasol

• Os yw’n cynnwys iaith sarhaus

• Os yw’r un fath â / yn debyg i ddeiseb a gyflwynwyd gan yr un person / corff corfforaethol lai na blwyddyn yn ôl

Os yw’ch deiseb arfaethedig yn methu, byddwn yn dweud wrthych beth y gallwch ei wneud i’w gwneud yn bosibl i ni ei rhoi ar ein gwefan. Os yw’n pasio, bydd yn symud ymlaen i’r cam nesaf

Y ddeiseb yn cael ei rhoi ar y wefan er mwyn i bobl ei llofnodi cyn y dyddiad cau

Y ddeiseb yn cau

Cyn gynted ag y bydd y ddeiseb yn cau, bydd angen penderfynu a yw’n dderbyniadwy ai peidio.

Prawf i weld a yw’r ddeiseb yn dderbyniadwy

Bydd y ddeiseb yn methu:

• Os nad oes digon o lofnodion

• Os yw’r amgylchiadau wedi newid

Os yw’n pasio, bydd yn symud ymlaen i’r cam nesaf

Y Pwyllgor Deisebau’n trafod y ddeiseb

Gallwch weld y broses yn y Pwyllgor Deisebau ar dudalen arweiniad ar ddeisebau.

Cyflwyno deisebau

Gallwch gyflwyno e-ddeiseb drwy ddefnyddio:

• ffurflen ar-lein.

• Dylech anfon y templed a’r ddeiseb i flwch postio’r Pwyllgor Deisebau: petition@wales.gov.uk; neu

• drwy’r post at  
  Y Pwyllgor Deisebau
  Cynulliad Cenedlaethol Cymru
  Bae Caerdydd
  CF99 1NA

Gallwch ffonio’r Pwyllgor Deisebau ar 02920 898998